قصص حب بالدارجة المغربية 7 قصص جديدة

بواسطة | مارس 17, 2021 | رومانسية بالدارجة المغربية

قصص حب بالدارجة المغربية ما بين الحزن والفرح والرومانسية قصص مغربية بالدارجة وقائعها حقيقية يسردها من عاشوها بحلاوتها ومراراتها

قصص حب بالدارجة المغربية
قصص حب بالدارجة المغربية

أنا كنموت عليه ولكن معرفتش آش ندير

اخيرا زعمت نكتب ليكم كنت خايفة من المعيار ولا الاستهزاء زعما كنزيد فيه ولا سلوكية بحكم شنو قريت فتعاليق مواضيع سابقة.والله يرحم الوالدين بلا سبان او تطياح الهضرة باغية غير النصيحة ونشوف آراء مختلفة، خاصة الرجال حسبوني ختكم طالبة المساعدة ومتبغيش شي واحد يستهزئ بها أو يعايرها.انا فتاة فعمري 27 سنة، باك+5 خدامة ومستقرة ماديا والحمد الله، كأي واحد عندي احلام مرتباهم بأولويات، من بينهم تكوين اسرة ولكن مشي ملهوفة على الزواج، والشرط الوحيد للي عندي هو نلقا شخص نتفاهم معاه ما امكن “l’âme soeur”.فالمشوار الدراسي مكانوش عندي علاقات ماشي حيت خايبة (ماشي شيي جمال أخاد، عادية والحمد لله) لكن كيجيني داكشي باسل وبدون هدف، زائد المستوى الفكري طايح بزااف، واحد هدرتو خاوية مغادي نستافد منو والو، يعني سادة المجال.

إقرأ أيضا : rasail hob hazina رسائل حب حزينة

فآخر الماستر مشيت سطاج 6 أشهر لشركة، وهنا خدمت مع واحد الشخص بدل ليا المفاهيم، وعرفت بأنه هو للي نقدر نبني معاه حياتي، السيد فين ما جيتيه كاين؛ دين، قراية، ثقافة، يقدر يناقش اي موضوع.سليت 6أشهر، دوزت امتحاناتي ونجحت. سيفط ليا ايميل بغا يعرف شنو درت، من بعد سولني واش تبغي تخدمي فالشركة يقتارحني لواحد البوسط بحكم عارفة ديجا المشروع. من طبيعة الحال قبلت وبلا أي خلفيات.داز عام، ونهار علا نهار كنتعلق بيه بلا منحس، كنا كنخدمو فرقة منسجمة واستطعنا نكونو جو يهرس التركيز والستريس ديال العمل. كان كيعوني بزاف فالخدمة وكيتعامل معايا مزيان وباحترام. شوية حسيت بشي حاجة. فهاد المدة كانو طلبات الزواج ولكن كنكول مستحيل نلقا شيحد بحالو، والسيد مزال مزعمش يهدر امكن باغي يعرفني مزيان ويشوف كيف دايرة من بعيد حيت قلال العلاقات للي ولاو كينجحو، زواج فالصيف طلاق فالشتا، وخوه عاد مطلق ببنية عندها عام.. شوية بشوية بدينا كنهضرو بزاف، عرفنا بعضنا مزيان خاصة فالربعين دقيقة ديال لانافيط كل نهار، وبدينا كنهضرو على المستقبل.

إقرأ أيضا : قصص حب رومانسية ممتعة تذوب القلب

واحد النهار شفتو مغير، الغد ليه مجاش عيط ليه والو، سولت الناس مفراسهم والو، سولت الرئيس كال ليا سيفط شهادة طبية فيها 3 أيام (هو تيكون تيموت كيجي يخدم)، سيفت ميساج وايمايل والو. فلليل جاوبني : السلام سمحي ليا كنت مشغول عندي شي حاجة نسالي ونعيط ليك. بقيت كنتسناه يعيط والو.داز هداك الأسبوع وانا مرفوعة، نهار الاثنين جا عااادي، سولتو ياك لباس كال ليا للا والو صافا الحمد الله، فالتران كال ليا: “غادي نرتابط”، حسيت بيه ولا غادي 400 كم/س، مفهمت والو؛ علاش كان سولني واش مخطوبة، علاش هدر معايا على المستقبل، علاش كيعاوني، علاش كان كيدافع عليا من المسؤولين، علاش كان كيتغير فاش شي واحد كيهدر معايا، علاش فاش كيعرف شيحد جا هدر فيا كيتقرص واخا عارفني كيفاش كنفكر… منعستش هديك الليلة. الغد ليه مشيت حاولت منبينش والو مقدرتش.

إقرأ أيضا : كلام رومانسى فى فترة الخطوبة

والسيد كيبان ليا حتى هو ماشي عادي، أو واحد ايتزوج ومبقاش كيضحك؟ دوزت مدة صعيبة بزاف وكلت انا للي خاطئة ونستاهل، واش جا هدر مع الدار؟ يعني معليا غير نتقبلها بروح رياضية وندوز لحاجة اخرى.مع الوقت معرفتش كيفاش دوزت شنو دار ليا ووليت كنهضر عادي وخا منسيتوش. واحد النهار سولتو “علاش؟”شرح ليا ” ماعندك ماتفهمي حيت انا براسي مافاهم والو، السيدة محتاجة مساعدة ونوقف معها وكنت عاطيها كلمة، وهدي هي الطريقة الوحيدة باش نساعدها.وباش تهناي راه كل واحد باقي فدارهم ومكيناش حياة زوجية، وميمشيش عقلك بعيد ماعمري درت لها شي حاجة” تخربقت وزدت تصدمت، مع الوقت فهمت.

إقرأ أيضا : rasail hob jamila b darija w l3arabia

نسيت شي حاجة سميتها ارتباط، عرفت بانها مسألة وقت يعني نتسناه; داز عام، عامين، وبداو المشاكل، خدامين فنفس المكان، وكنشوف الوقت بدا كيدوز ووليت عايشة بلا تخطيط الحاجة اللي مكنتحملهاش، وعاد حليت عيني “كيفااش كنا كنهضرو على المستقبل وتجي تكول ليا غادي نرتابط؟؟؟” قررت نبدل الخدمة باش نرتاح انا ونريحو هو من الصداع، ويلا كان باغيني راه عارف الدار.دابة بعدت ولكن باقيين على اتصال، عارفاه باغيني ولكن ضروفه متسمحش ليه، اتكولو ليا فيقي من الgلبة، انكول لكم السيد كانعرف كفاش كيفكر، الداخل ديالو مزيان، ومغاديش يخاف مني اكون باغي اتزوج من وحدة اخرى، ولدابة باقي فدارهم، ولكن راه حتى انا حياتي موقفاها على قبلو، وتعلقت بيه بزاف لدرجة وليت كنهدر غير مع الدار وهو منهار عرفتو.الله يرحم الوالدين للي بغا ينصح مرحبا ولكن بلا سبان ولا جرح المشاعر ديروني ختكم.

قصص حب بالدارجة المغربية : أستاذ الماط تيبغي بنت صغيرة

قصة غريبة حيت ماعمر شي حد بحالي قدر يعتارف و يقول أنا فهاد العمر و بغيت بنت صغيرة صغر من بناتي
بلا مانطول عليكم أنا أستاذ ديال الرياضيات في الاعدادي كانقري 5 ديال الأقسام كلهم ديال الأولى إعدادي. كنبغي المهنة ديالي واخا صعيبة واحد الشوية و فيها بزاف ديال تمارة و المسؤولية، دابة هادي 25 العام وانا كانقري فهاد الاعدادية، العمر ديالي دابة 50 سنة مطلق و عندي بنت، حتى أنا تزوجت بعد واحد العلاقة ديال الحب زوينة بزاف و كنت كانقول غادي تبقى ديما حتى تفارقنا الموت، لكن واقيلا كدوبنا هو اللي فرقنا، حنا بحال جميع ليكوبل كنا فاللول اكنحاولوا نباينو الجيهة الزوينة فينا و نبينوا راسنا كول و …. المهم تزوجنا مشينا سكننا بحديتنا حيت الحمد لله الواليد ديالو ظروفو ميسرة و عاوني نشري داري و نسكن بوحدي. مشينا للدار دازت سبع يام ديال الباكور إوا بدات المشاكيل بدا كل واحد فينا كايلقا راسو مع واحد الشخص ماكيعرفوش، أنا ماكنلومهاش بجوج بينا درنا أخطاء، بجوج بينا بيننا الجيهة الزوينة فينا. اختلفنا فكلشي فالتقسيم ديال المسؤوليات و التقسيم ديال المصاريف هادشي خرج لينا مشاكيل أخرى.

إقرأ أيضا : قصص رومانسية قصيرة 8 قصص ممتعة ومشوقة

كنت كانقول فراسي هادشي دابة يزول، هادشي عادي كاع الأزواج ماكايتفاهموش فالأول و كاتكون بيناتهوم المشاكيل لكن صبرت بزاف دوزت 6 سنين من حياتي لقيت راسي كانضيع عمري وسط المشاكيل و صداع الراس و علاقة ماعمرها بغات تتقاد. قلت فراسي باركة من هاد اللعب من الأحسن كل واحد يشد طريقوا على الأقل نرتاحوا شوية، واخا بقات فيا بنتي حيت غادي تكبر بعيدة على باباها و لكن اللهم هاكدا و تلقاني ديما جنبها و لا تشوفني ديما و لكن تشوف غير الصداع و المشاكيل بينات واليديها.
طلقت، جاتني صعيبة فاللول ضعافيت ماسخيتش لا ببنتي لا بمراتي حيت كنت مزال كانبغيها و لكن الله غالب مايمكنش لينا نكملو هاكداك. حتى واحد فينا مابغا ينزل يدو و إلا بقينا هاكداك ماعمرنا نزيدو للقدام كنا غادي نزيدو غير فالمرض و المشاكيل. حاولت نبدا حياة جديدة لكن القضية ماكانتش ساهلة جاتني صعيبة بزاف و بطبعي اجتماعي نسكن بحديتي جاتني قاسحة كنت كانحاول ندوز الماكس ديال الوقت برا الدار رجعت نشرب بعد ما كنت قطعتو… المهم شفت راسي ماغاديش للخير وانا نكري ديك الدار و رجعت سكنت مع الوالدين ديالي.

بقيت ديما خايف من الارتباط مع شي وحدة جديدة، معاية أستاذات زوينات و فايت وحدة لمحاتلي للزواج و درت راسي مكنفهم والو و فايت واحد جوج صحابي اقتارحوا عليا واحد جوج بنات و لكن خوفي من الزواج كان كبير، كنت كانتخايل راسي غير غادي نتزوج غادي نبدا عاود فالمشاكيل و الروينة قلت اللهم نبقى هاكدة بعد راني مهني، كنت كانتصاحب مرة مرة ولكن غير باش ندوز الوقت و صافي ماشي ناوي الزواج و المعقول و ما كنت كانكدب على حتى شي وحدة. و فنفس الوقت كنت كنحاول نعطي وقت كثر لبنتي و نحسسها باللي عندها باباها و مهتم بيها و كيبغيها.
دوزت 16 العام وانا فنفس الروتين، حسيت براسي فقدت الاحساس بالحب كنت كانقول خاصني نبغي شي وحدة باش نزعم و نتزوج عاود ولكن اللي ماعندو زهر راه ماعندوش نهار بغيت لقيت راسي كانبغي بنت كبر منها انا ب 35 عام شفتو على حصلة و على شوهة.

إقرأ أيضا : رسائل حب مغربية بالدارجة مكتوبة بالعربية والفرنسية

فالدخول المدرسي ديال العام اللي فات بانتلي بنية زويونة وجهها كايبان كبر من العمر ديالها، فاللول قلت عادي حيت شحال من مرة كاتبان ليا هادي زويونة هادا ولد زوين هادا كايقرا … والكن داكشي عادي فإيطار الدراسة و بنظرة ديال أب لا غير لكن هاذي من بعد واحد شهرين لقيت راسي كنفكر فيها تفكير آخر، باغيها تكون مراتي حلمت بيها بزاف دالمرات الصراحة كرهت راسي، وليت كانشوف راسي بيدوفيل ولكن أنا متأكد باللي بديت كانبغيها، و لكن مادرت والو بالعكس كنت كانتفاداها باش ماندير حتى شي سلوك ماشي هو هداك و حتى فالمعاملة كنتعامل معاها بحال كلشي حيت عارف فاللول و فالآخر هادشي مستحيل واخة نيتي مافيها حتى شي حاجة خايبة
أنا غير بغيت نبوح ليككم بداكشي لي فالقلب ديالي و داكشي لي حسيتو، و كونو متأكدين باللي ماوقع والو من غير هادشي اللي عاودت ليكم.

قصص حب بالدارجة المغربية من القلب

قصص حب بالدارجة المغربية : الله ينيجكم من لمرا الطماعة

ماكنتش كانقرة مزيان ولكن حتى أنا آمنت باللي القراية هي اللي تقدر توصلني لواحد الحيات مرتاحة و مقادة (ماديا)؛ فاللول كنت طالع بصعوبة و عاودت الباك ولكن العام الثاني ديالي تقاتلت حيت درت عقلي و كان قدامي واحد المثال هو اللي محفزني (واحد ولد الحومة خدم و دار الطوموبيل و سكن فحومة زوينة) قلت علاش اللا حتى أنا و لكن لقيت راسي باللي طالع خاوي، وخا هاكداك قلت فراسي على الأقل ناخد هاد الباك و ديك ساعة يحن الله، درت جهدي كولو سمحت فشحال من حاجة على وديت القراية و الحمد لله ربي ماخيبنيش، جبت الباك داك العام ولكن راكم عارفين النقطة على قد الحال كان قدامي جوج ديال الاختيارات إما لافاك إما التكوين، اختاريت لافاك قلت عندها مستقبل حسن اندير مجهودي و انشاء الله نوصل لشي حاجة مزيانة، القراية فلافاك شكل آخر و أفكار آخرة ديك الروح اللي كانت عندي فلبدو مشات، لقيت راسي بحال غي غادي مامهتمش و لكن الهدف ديالي مسمحتش فيه بقيت معاهوم حتى جبت الليصونص ديالي واخا مور 5 سنين. بديت تانقلب على خدمة من هنا لهنا، نرغب هذا هذا يبقا علي بالهضرة… ندفع الكونكورات ديال الدولة و حتى حاجة ماشدات. لقيت راسي داخل فالعام بلا خدمة و غير النكير ديال مالين الدار صبرت حتى عييت قلت غادي نقلبها بيعة و شرية، هضرت مع واحد الأخ ديالي عايش فالخاريج ضبر علي بواحد الرزيق كريت واحد المحال و بديت كنبيع فيه حوايج ديال العيالات و الماكياج …

إقرأ أيضا : رسائل حب مغربية رومانسية كلها عشق وغرام

فاللول كانت القضية قاصحة شوية بسيف باش كاتشيطلي شي حاجة فوق الكرة ولكن اللاهم هاكدة ولا النكير ديال مالين الدار. و لكن الحمد الله دوزت واحد 6 شهور القضية بداك كاتحرك شوية درت كليان ديالي وليت كانربح كثر، فداك المحال مع خدمتي كلها غير مع العيالات اتعرفت على واحد البنت حتى هي من الكليان ديالي المهم ولينا كانطولو شوية فالهضرة مابقاتش غير فالحدود ديال الخدمة، البنت الصراحة كانت تتعجبني المهم مع الوقت علاقتي بيها تطورات، تصاحبت معها دوزنا تقريبا عام و مع القضية زيانت و البيع و الشرا غادي مزيان قلت فراسي ماكاين لاش نبقا مجرجر معايا هاد بنت الناس ماحد الأمور ميسرة أنتقدم ليها، هي هاديك هضرت مع الواليدة فاللول و جبتها وريتها ليها الواليدة ماقالت والو عجبتها البنت صافي هضرات مع الواليد و مشينا خطبنا البنت، كلشي كان مزيان كنا مفاهمين دوزنا شهر على الخطوبة درنا العقد ديال الزواج و اتافقنا باش نديرو العرس فشهر 10 حيت فالصيف كاتكون عندي الخدمة بزاف و مايمكنش لي ديك لوقيتة نخلي المحال و نصافر أنا و مراتي، المهم كلشي كان مزيان مور العرس كلسنا واحد 2 سيمانات فدارنا من بعد خرجنا سكنا بوحديتنا ماكانو لا ماشاكيل لا والو غير هي كانت باغية تحس بلي مستقلة و دير اللي بغات و قلت فراسي حتى أنا هكذا مزيان، ماكنت مخصر ليها حتى حاجة اللي بغاتها كانوفرها ليها، حتى الدار ماعجباتهاش فاللول بدلناها مشينا لوحدة حسن، كنت مفششهة تانقول فراسي ماحد الأمور ميسرة عليا ماكاين لاش نزيرها . و دقة دقة المشروع ديالي زدت كبرتو خديت كريدي من البانكة و شريت محال ديالي تهنيت من الكرى و محال كبير و فموقع حسن، مع مراتي كانت الأمور مزيانة وليت كانبغيها بزاف دوزنا عامين ولدنا توام 2 وليدات فرحت بزاف حيت كنت باغي الولاد و الصراحة أنا تزوجت غير على وديت الولاد، كانت الفرحة ديالي كبيرة و كنت كانحاول نوفر ليهم و لماماهم كلشي و مانخصرش ليهم الخاطر. حتى وصل واحد النهار اللي تغيرات فيه حياتي تقلبات فيه سفاها على علاها، الجمعة مع 3 و نص دالصباح عيطلي العساس ديال القيسارية اللي فيها المحال دالي، غير شفت النمرة ديالو عرفت شي حاجة خايبة وقعات جاوبت و كانساين الصدمة اللي غادي يصدمني، آلو فلان أجي راه طرطقات بوطة فالقيسارية و راه المحال شعلات فيه العافية. الركابي ديالي فشلو مبقاوش قادرين يهزوني، نضت مشيت لقيت العافية شادة و مقدر حتى شي حد يوصل ليها.

إقرأ أيضا :يوم عيد الحب واختلاف تاريخ الاحتفال به بين دول العالم

الأرض بدات كاضور بيا، كلشي اللي فراس مالي حاطو فهاد الحانوت، ماكنت كانوفر والو و عليا الكريدي ديال البانكة، آش غادي ندير دابة. المهم خليتها على الله فكرت حتى عييت قلت نعيط للأخ ديالي نشوف إلى عندو شي حاجة باش يعاوني، قالي باللي ماعندو والو اللي كان جامعو حطو فواحد الدار شراها هنا فالمغريب، مالقيت حتى واحد جنبي حتى مالين السلعة مابغاوش يعتقوني.

دوزنا شهر مابقيت لقيت مانصرف قلت نرجع نعيش مع ضارنا حيت حتى فلوس الكرى مابقاتش عندي، هنا مراتي لقيتها ولات مرا واحدى آخرة، فينها ديك اللي كنت كانحس بيها كاتبغيني و غاتصبر علي و توقف معايا فالحارة و الحلوة، والوووو بدات بحشيان الهضرة و المعاني، نسات كاع داكشي اللي كنت كانديرو على وديتها و بدات كاتحرش علي حتى ولادي، و ديما مناقشة مع الواليدة، صبرت حتى عييت وانا نصيفطها لدار باها، دعاتني على الطلاق ادخلو العائلة بيناتنا باش يصالحونا و والو مابقيتش معمر ليها العين كانت كاتشوف فيا بانكة كاتجبد منها الفلوس نهار مابقاوش الفلوس مابقات عندي قيمة، كولشي دوزتو ولكن اللي مابغاش يتصرط لي هي ولادي ولادي كانبغيهم كثر من أي حاجة، دابة هاهوما بعاد عليا و من فوق هادشي مهم كادير كلشي باش تشوه صورتي قدامهم و تكرهم فيا. حكمات لينا المحكامة بالطلاق و النفقة ديال الولاد و مع ماكينش شي خدمة مقادة ماكنت كانعطيها النفقة ديالها و هادشي اللي خلاني ندوز الحبس، المهم حياتي قصاحت من كل جيهة. حتى حاجة فحياتي مابقات زوينة ولا كاتفرح.
هادشي كولو سبابو مراتي اللي مالقيتهاش بنت الناس و صبرات معايا فالمحنة ديالي وليت كانحس براسي مضمر مابقات عندي حتى رغبة فالحياة فكرت بزاف ديال المرات في فالانتحار، حيت مابقيت صالح لوالو و مابقات عندي قيمة حيت ماعرفتش نتصرف و ضنيت باللي هاداك العز اللي كنت فيه غادي يدوم

قصص حب بالدارجة المغربية من القلب

قصص حب بالدارجة المغربية : هادا هو الحب

هادي خمس سنين على موت الواليد ديالي، كان راجل و نعم الرجال، واخا كنا كبار انا الصغير فخوتي كانت عندي 33 عام ولكن الموت ديالو خلات بلاصتها تأترت بيه بزاف حيت معمرو عاملني لا أنا لأي واحد من خوتي على أساس أننا ولادو كان بحال شي صاحب ديالنا، الحمد لله القضاء ديال الله هو هادا، مسكين يلاه مرض 6 شهور و مول الأمانة خدا آمانتو. ليامات اللولة اللي كان يلاه مات فيها كنا ديما كانمشيو عندو نزوروه، شوية ولات جمعة ايه جمعة لا و شوية ولات مرة فشهر…. ولكن دايما مني كنت كانمشي نزورو فالقبر كنت ديما كانلقا القبر ديالو زوين و مقاد، دائما منقي و فيه شي وريدات، فاللول كان كايسحابلي باللي الواليدة هي اللي كاتجي تقاد داك القبر، ولكن واحد النهار كنا مجموعين و بقينا كنهدرو عليه شوية وانا نضحك مع الواليدة قلتليها راجلك واخا مات مازالة كاتهلاي فيه القبر ديالو ديما كايشعل، صدماتني قاتلي باللي ماعمرها ماقربات ليه حيت حتى هي ديما كاتلقاه مقاد و كايسحاب ليها باللي شي واحد منا هو اللي كايقادو فحال هاكداك، المهم عيينا مانفكرو ماجالينا حتى شي حد فالبال اللي يمكن يديرلو هاكداك و قلت فراسي واقيلا داك اللي مسؤول على القبر هو اللي كايدير داكشي حيت كان كايعرف الواليد واقيلة…

إقرأ أيضا : شعر عن حب 

صافي بقات هاكداك دازت 4 سنين واحد النهار ضاق علي خاطري مع شي ماشاكيل فالدار بقيت كالس كالس وانا نقول فراسي أنمشي نزور القبر ديال الواليد و هي النيت نترحم عليه شوية، كانلقة واحد المرة كبيرة شوية كالسة حتى هي فالقبر فالول الصراحة التخلعت مع يلاه خليت الواليدة فالدار قلت فراسي مايمكنش تكون سبقاتني وجات، بقيت غادي بالشوية قلت هادي ماتكون غير شي سحارة كادير شي عجب تماك، مني قربت لحداها لقيتها كتنقي القبر من داك الوسخ و الربيع اللي فيه، كلست حداها ماعرفت راسها باش تبلات، قلت ليها السلام رداتو علي و بعات تنوض تمشي، شديتها من يديها قلت ليها واش تتعرفي هادا اللي ميت هنا، قالت لا واقيلة راني غالطة قلت ليها لا مايمكنش ليك تغلطي طول هاد المدة، حسيت بيها تزيرات قلت ليها انا مطالب منك والو غير بغيت نعرفك شكون نتي و صافي، بقات ساكتة واحد شوية و هي تقول نتا ماغاديش تعرفني نتا مزال صغير سير سول مك على فلانة و هي تقوليك شكون أنا

مشيت بالزربة عند الواليدة ياربي تسمح لي بلا مانترحم حتى على الواليد، تصدمات مني قلت ليها السمية سكتات حتى هي، حسيت بيها بحال إلي راها شي وحدة مضولمة أولا مانعرف، قالت لي بلي هديك السيدة كان تايعرفها الواليد قبل مايتزوج كانو تايبغيو بعضياتهم لكن ماين الواليد الله يرحمها مابغاتوش يتزوج بيه و مني بقا لاصقها خيراتو بين السخط و الرضة إلى بقا معاها حيت عائلة ديال ديك المرة كانو عندهم شي ماشاكيل مع العائلة ديال الواليد… و ديك المرة على حساب ماعودتلي الوليدة مور ماتزوج الواليد حتى حى تزوجات و لكن دغية الطلقات و بقات هاكداك بلا زواج و على مابانلي واقيلا مازالا كاتبغي الواليد الله يرحمو حتى لدابة.
الحب ديال بالصح كيف داير

قصص حب بالدارجة المغربية من القلب

قصص حب بالدارجة المغربية من القلب

الحب ماشي هو كلشي

أييه الناس كامليني تايتقاتلو على الحب و كاينين لي كايقوليك مانتزوج حتى نكون كانبغي شي وحدة ولكن أنا ضد هاد الفكرة، الصراحة حتى أنا كنت كنآمن بهاد الفكرة و مقتانع بيها و كاندافع عليها. ولكن
قصة حب كانت زوينة بزاف، آه كانت 6 سنين وانا معاها اتعارفنا فلباك و تصاحبت معاها فلافاك. دوزت معاها الصراحة أحسن أيام حياتي، تقاسمت أناوياها الحارة و الحلوة، كاندابزو و نرجعو كان حبنا قوي بزاف درت اناوياها بزاف دلحوايج واعرين فحياتي، كانت كتكملني و كنكملها كنا مفاهمين واخا كلشي، كانت قابلة عليا كيفما أنا وحتى أنا قابل عليها كيفما هي بعيوبها و كلشي. الصراحة صحابنا كاملين كانو كايحسدونا على حبنا و العلاقة اللي بيناتنا و زادو حسدونا مور ماقررنا نتزوجو، حيت الحمد لله قدرت نضبر فخدمة دغية مور ماسليت قرايتي. خدمت جمعت واحد شوية دلفلوس إوا صيفطت مالين الدار يخطبولي. الصراحة دالله حتى واليديها ناس مزيانين ماكتروش عليا و داكشي لي كان ناقصني كملوه ليا الواليدين. هي هاديك وصل الصيف درنا واحد العراسية فاعلة تاركة، و مشينا دوزنا سيمانة ديال العسل صافي رجعنا للدار، مع يلاه خدمت كنت متفاهم أناوياها باللي غادي نسكنو مع دارنا شي يامات بيما نجمع شوية دالفلوس و نضبرو فشي دويرة… صافي هي هاديك كيف كانقولو سبع يام ديال الباكور سالات إوا بداو الصداعات، أنا وياها ماكان عدنا حتى شي موشكيل كانت مشاكيل مابينها و بين الواليدة و كانت لواليدة كاتقولي باللي فيها شي خسايل ماشي حتالهيه كنت كانقول واقيلة غير لواليدة كتزيد فيه، قلت باش نبعد شوية من الصداع أنخرج نكري ضبرت على واحد المحال على قد الحال واخا الواليدة عكسات لي مابغتنيش نخوي الدار والكن قلت نخرج قبل ماتوصل للعيب مع المدام بعد هاكدا تبقى العلاقة مزيانة ماشي حتى توقع شي كارثة.

إقرأ أيضا : شعر تغزل تغريدات شعرية رومانسية

رحلت للدار الجديدة عجباتني العيشة الجديدة حسيت بالراحة حسيت براسي مزوج بالصاح، حيت غاد لقيت راحتي مع المدام ولكن ولكن مع المدة بدات كاتبنلي باللي دوك الشكاوي اللي كانت تاتقولي على مراتي بالصح، إوا الشك بدا كايعمر لي الراس، ماشي الخيانة و لكن لقيتها تاتخرج من مورايا مع شي بنات كنت قايليها متبقاش تخرج معاهوم، لقيتها كاتاخد الدوة باش ماتحملش واخا كانت عارفاني حامق على الولاد، و المشكيل الكبير هو السحور. نهار لقيتو ماعرفتش آش ندير.
حسيت براسي بحال إلا التنصب علي آه أنا كانغيها و أنا اللي بغيتها اللول و مشيت هدرت معاها… ولكن دبا لاش غادي تسحرلي

الصراحة ماقدرتش نسمح ليها حيت واخا تكون دايراه لحاجة مزيانة أنا مايمكنش ليا نعيش مع وحدة ولات كاتبان ليا متخلفة و بلي بالنسبة ليها الفقة و السحور هم الحل.
الطامة الكبرى منين قلتليها هادشي بدات تاترغبني شوية هي التسيف قالتلي إلا طلقتيني نديرلك التقاف و مانخلي حتى وحدة تشوف فيك…
دابة آش بان ليكوم أ الناس ديال الحب؟

كرهت راسي حيت زوينة

فعمري دابا 28 عام، قصتي بدات مني بديت نعقل على راسي، الحمد ربي خلقني زوينة و لكن هاذ الزين كان هو سباب مشاكيل ديالي من صغري كانو البنات اللي قدي كيغيرو مني و كانت علاقتي معاهم خايبة بسباب هادشي لدرجة واحد لوقيتة الوليدة كانت مابقاتش كتخليني ندير الصحابات، من غير هادشي كانت ديما حاضياني و خايفة عليا و ديما تتوصيني حيت كيف تتقول أنا عاطية للعين. المهم كبرت بديت كنعرف شي حاجة سميتها الحب، المصاحبة…

كانو ولاد الحومة كلهم لاصقيني ولكن أنا ماكنتش كنبغي نضصر عليا حتى واحد باش منجيبش لراسي الهضرة و الصداع مع الدار واخا كنت كانبغي واحد ولد جيرانا كنت كنهدر معاه مرة مرة ولكن هدرة عادية كان مرة مرة كايلمحلي بلي كنعجبو ولكن أنا مكنتش باغية نبينلو شي حاجة. كنت كانفرح بزار مني كايهدر معاية نهار مشا يقرا فمدينة أخرى تعدبت بزاف جاتني صعيبة منبقاش نشوفو و قلت فراسي ضاروري يشوف وحدة أخرى معاه الجامعة تكون حتاهي من المستوى ديالو، مهم دارت ليام كمل قرايتو رجع بدا الخدمة فنفس المدينة فرحت بزاف كنت كنحس باللي صبرت و قربت نوصل لداكشي لي بغيت واخا مابيني بينو والو. واحد نهار واحد صاحبتي جابتلي خبارو حيت هو صاحب خوها، قالت لي باللي مصاحب مع شي وحدة أخرى.

إقرأ أيضا : تزيين الغرفة لليلة رومانسية

حسيت بموس تخشا في تصدمت ديك ساعة غاد حسيت باللي كنت غير موهمة راسي، دازت ليام جا خطبني واحد الولد حتى هو من الحومة صافي قلت فراسي هذا هو زهري و من فوق هادشي ولد زوين و ضريف و مافيه مايتعاب الكارثة هي مور هاد الخطوبة تقدملي داك لولد اللي كانبغي اه كارثة، فرحت بزاف واخا حشمت من الولد اللي جا قبل منو ولكن قلت فراسي هذا كانبغيه إلا قبلت لاخور غادي نضلم راسي و نضلمو معاية حتى هو.

صافي هي هذك بابا اعتادر للول… هي هاديك كملنا العرس كان زوين بزاف و كنت فرحانة فرحة معمرني فرحتها،لكن هنايا سلات الفرحة من حياتي كلشي كان زوين لكن مور الزواج لقيت ولد آخر قدامي، ماكيديرلي حتى اعتبار مكيحسسنيش بلي راني مراتو… والوووو بالعكس وصلات بيه الحقارة أنه يهدر مع بنات آخرين قدامي و يقولي عادي مالك معقدة. عييت منصبر لقيت راسي مزوجة غير بالسمية حتى الدار مابقاش كيعمرها مفهمت فيه والوو ماعمرني دوزت معاه نهار زوين من مور ماتزوجنا.

ولكن الحاجة اللي فقصاتني و طيحت في النص كيف كايقولو هي نهار جات عندي ديك صاحبتي النيت و قاتلي باللي هاد الزواج كان غير تحدي بين ولاد الحومة، زعما اللي أيتزوجني أيكون هو ماعرفت شكون فديك الحومة، معمرني تخايلت هادي حسيت براسي مالايقة لوالو احتاقرت راسي بزاف، ماتفهماتش لي، ولكن هذك هي الصراحة صافي مشيت لدارنا قلت للواليد ديالي يطلبلي الطلاق.
دابة كاع الأمراض تسلطوا بي، كرهت الرجال، كرهت المغاربة، كرهت راسي، كرهت كولشي
ماعمرني تخايلت باللي الكاين اللي كايشوف البنات بحال شي سطل ولا سباط ولا ماعرفت

قصة حب بالدارجة المغربية

السلام اليوم تانا درت حساب جديد باش نعاود قصتي بكل اريحية
المهم قصتي بدات قبل عاماين ونص تقريبا
كنت كانقرى فالباك وكنت كانعرف واحد الانسان ف فايسبوك كنا كانهدرو ديما فامور العادية دالحياة.فمقابل هادشي فالمحيط ديالي كان معروف عليا بنت محافضة ومأدبة ومخلقة وكنت كانقول مستحيل نتصاحب وهادشي كان كابخلي الناس لي كايقراو معاي كايشوفوني معقدة.

المهم دازت شي خمسة اشهر واحنا كانهدرو عادي ولكن كنت معجبة بيه وبديت داك الساع كانحس براسي معجبة بيه تا لواحد النهار كان غبر سيمانة . وداك السيمانة كلها وانا كانفكر فيه ماكانكل مزيان ماكانشرب ماكانحس لا بجوع ولا بنعاس. المهم تما عرفت راسي متعلقة بيه بزاف .. وماعنديش نمرتو باش نعيطلو وماكانعرف تا شي حد كايعرفو المهم تخلعت علبيه وتوحشتو ….وكنت حاضية غير فوقاش يدخل..المهم سي السيد تكونيكطا وهدر معاي قالي كنت مريض قلتلو تخلعت عليك بزاف بلا مانحس تما عرفني راني طايحة على فمي وبدا كايلوحلي الهدرة تا لواخد النهار صارحني بلي كايبغيني

كنا فالاول السمن والعسل بحال اي جوج عاد بداو . وكلن كايبينلي بلي هو انسان محترم وبسيط ومتواضع و نقي و متقي الله ولمحلي بلي فيه هاد الاوصاف بواحد الطريقة دكية بزافف تا قنعني وتافقنا على ان علاقتنا غاتكون نقية و درنالها حدود باش باش مانزدقوش مزبلينها… دازت ايام واعرة كان كايحترمني وماكايبغيش يقلقني و علاقتنا غادة فمنحنى جيد داز العام نجحت فالباك بنقطة ممتازة و هنا فين غاتبدل الامور..

من بعد مانجحت بنقطة مزيانة كانت عندي الاهلية باش نكمل فجامعة ففرنسا .يعني ماكانش عندي مشكل تمشي نقرا ففرنسا لا من الناحية المادية و لا من الناحية المعنوية .حنا واخا ناس بساط بزااف ومابحالناش ولكن كانت عندي فرصة حقاش واحد السيد لاباس عليه بزاف كايعرف الواليد . ومن كان صغير الوليد كان وقف معاه باش يخرج الخارج يقرا ومشا وقرا ولا رجل اعمال وهو بغا يوقف معاي كما عاونو بابا وشجعو . المهم قلتلو بلي غانكمل ففرنسا لقرايا قالي لا راه يقد يطمع فيك ولا يبقا يعاير فيك بهادشي قلتلوانا غير غانوقف على رجلي ماغانبقاش عندهم و ماغانبقاش نخليهم يعاونوني قالي عافاك انا مستعد وقاد نعيشك العيشة لي بغيتيها غي ماتمشيش وانا راني حاس بلي تقدي توصلي فالمغرب .. خليك معاي ونكونو راسنا بجوج و نتزوجو … المهم قلت لواليديا غادي نبقا فالمغرب انا باغا نكون راسي هنا
دوزنا الصيف عادي ديما كانهدرو فالتلفون وكانخططو لحياتنا ومرة مرة كانتلاقاو ..من دخل العام الجديد تسجلت فلافاك واخا تقبلت فمعاهد عليا. هادشي كلو باش نبقى فنفس المدينة لي ساكنين فيها .قنعت راسي بلي نقد نعطي فالجامعة . من بدات القرايا ولاو عندناشي مشاكل فالدار مادية . وليت كانعاني بزااف هو ماكانقدش نقولو عندنا مشكل فالفلوس وماكانلقاوش باش نخلصو دوا دماما الغالي . وبابا جاه السكر لقاو فيه اربعة دالغرام. من كانكونو كانهدرو ماكانعاودلوش كلشي ولكن كانلقى راسي كانبكي وحنا كانتهاودو على شي حاجة . وهاد المشاكل اترو تا على نفسيتي و على قرايتي

هنا لقيت الاسدس الاول داز و مادخلت تا مادة ومرضت ولا شعري كايطيح من بعد نامان شعري قوي وغزال وليت صلعة من الداخل ولاو عينيا كحلين من التحت تاهو زادني بفقصتو من تبدل عليا. وضعافيت بزااف كنت بيطيزة ماشي بطوزة ولكن وليت نحيلة وكنت فاش ما نحتاج نهدر معاه كايقولي مانقدش نسمع لهاد المرض ديالك انا راه خاصني نعيش الايجابية حقاش ماباقيلي والو و نتخرج . من كنت كانتلاقاه واخا كانتقادلو كايعايرني بصلوعيا (كن غي كان كايسكت) المهم مابقاش هداك لي كان فالاول .ولا سادج وكايديها غي على المضاهر وماشي كما عرفتو فمرة . من بعد ماتقت فيه و فالوعد لي عطاني . فجاني بزاااف بداك التغيير
انا الصدمة ديال الرسوب والتغيير ديالو مع المشاكل لي كانو عندنا فالدار كنت غانحماق واخا هكاك كنت كانحاول نقنع راسي بلي راه مساندني ومعاوني .وراه خاصني تانا نعونو باش يكمل العام لي بقالو . وانا خاصني ندير شي حل لراسي حقاش كان كايجيني انهيار عصبي. بديت كانمشي عند طبيب نفساني وباش تخلصو كنت بعت واحد السنسلة ديال الدهب شراتهالي جداتي من نجحت فالتاسع .المهم شديتها بكيت عليها حقاش عمري مابعت والا فرطت فشي هدية كما كانت رخيصة ولا غالية. وبديت نمشي عند داك الطبيب وتحسنات حالتي شويا .ولكن ماقديتش نقرا الاسدس التاني حقاش كنت ديما ناعسة بسبب الدواء دالاعصاب.
هو ولا كايشوف الفوق ا ولا كايقارني بالبنات لوخرين والنجاحات ديالهم و لا كايحسس بالغررور الشيء لي خلاه يتراجع على فكرة الزواج لي كنا متافقين عليها قبل وكان ديما كايتهرب من الموضوع.

داز العام انا ماقديتش ننجح (واخا ماكيناش شي حاجة سميتها السقوط فلافاك) هو تخرج بنقطة مزيانة فرحتلو ولكن هنا ولا انسان اخر . ولا كايوريني البنات لي تخرجو قالي شوفي الناس لي كايقراو ولي ماعاطيينهاش للتخربيق بحالك. بلا مايراعي لتاحاجة . !!!!!
ولا كايقولي جيتي هنا خايبة..(المهم باغي يصدرني باي طريقة)
منين خدم قلتلو مبرك و على سلامتك واخيرا سهل علينا الله (حقاش حنا كنا متافقين غير يخدم نتزوجو حقاش عندو دارو) منين قلتلو دابا خاصنا نتزوجو ومانبقاوش فالحرام ونكملو داكشي لي تافقنا عليه وداكشي لي تواعدنا عليه … قالي انا مانقدش نتزوج دابا !! قلتلو:لاش؟
قالي: (وهو كايفكر) انا ماجامعش الفلوس دالصداق والعرس
قلتلو ياك اول مرة هدرنا فهادشي قلنا ماغانديروش العرس غانديرو غي صدقة. والفلوس دالصداق غاتعطيهملي من بعد!!
قالي: مامسلكنيش هادشي
قلتلو : انا لي خاصني مايسلكنيش هادشي ا فلان
قالي : واليديا ماغايبغيونيش نتزوج دابا
قلتلو: ياك حنا تافقنا باش نتحداو اي حاجة باش نكملو هاد العلاقة فالحلال وعقلتي افلان من قلتلي انا خدمتي طبيعتها غاتخليني مرة ميسور ومرة ماعندي فن نبات وجيت قلتلك انا مستعدة نبات معاك فالزنقة وناكل معاك الخبز والما
قالي رراكي ماغتفهميش هادشي ونتي خاصك غي تزوجي وهادشي لي كاتفكري فيه
انا هنا تصدمت وعرفتو بلي نسا داكشي لي كان مواعدني بيه و نواعداه بيه او ولا انسان اخر. ماشي بداك الاخلاق والشهامة لي عرفتو عليها. وانا داك الساعات كنت كانبانلو بحال الى كانتلصق عليه

وليت ماكدة بلي ولا طماع ولا خاصو شي بنت عائلة كبيرة لي يتعنا بها و تعاونو باش يبان على عباد الله. وانا ماسلكاهش حقاش كانقرى غير فالجامعة او عائلة متواضعة بزااف … وبدا كايجيبلو الله مانقد ندير والو وهو وااعر عليا (فهموها بهد التعبير)
او ولا كايتعامل معاي بمنطق انه احسن مني و يستاهل ما احسن مني (مغفل!) تا لواحد النهار لقا خويا واحد الورقة كان كتبلي فيها داكشي دالرومانسية من كنا اول مرة تلاقينا او بقات عندي .. ومرة مرة كانجبدها نقراها حقاش واخا هادشي كلو كنت مولفاه وكانبغيه بزافف وكنت دايرة فيها تصويرتو .. الكارتة لقاها خويا وقراها و شدني عطاني بواحد التصرفيقة من بعد ماكان عمرو ماقاص فيا ولا سبني كانت علتقتنا وااعرة بزاف . هنا قالها لبابا واتفقو باش يزوجوني لواحد ولد جارنا كان ديما كايجي يهدر الوليد عليا وكايقولو بابا البنت عندها مشاكل تاتقاد افكارها ونستاشرو معاها الى قديتي تصبر صبر ماقديتيش حنا مانقدوش نفاتحوها فالموضوع دابا باش تكون الرؤية ديالها صافية
من قلتلو شنو كاين قالي صبري وتزوجي الى بغيتي!! (حقير) والمشكل فعاوك مايسولني شحال فعمرو ولا واش. قاري ولالا بدا كايسولني شنو نوع ديال الطوموبيل لي عندو و تاصالير شحال كايشد . وقلتلو انا ماباغاهش ا و خويا مبززو عليا .قالي مانقد نديرلك والو. !!.. انا من رفضت داك السيد فالدار ،واليديا بداو بضغطو عليا وخويا قالي شوفي نتي راكي طحتيلي من عيني من بعد ماكان كايسحابلي راكي خرجتيي من طينة مزيانة وقالي الحاجة الوحيدة لي تقد تغفرليك الغلط ديالك هي تزوجي باش ضمنيلي عمرك ماتعاودي تصاحبي .هاد الهدرة بقات فيا بزااف و لكن ماقديتش نقبل بداك السيد واخا كان من شحال هادي وهو كايهدر مع الوليد و الاخ ديالي.قلت خويا غايسمحلي او واليديا حقاش حنان واخا هكاك و كانبقى بنتهم و ماقديتش نزوج بداك تلسيد فمرة وبقيت شحال وانا طايحة فالفراش ماكانقدش نتمشى منين شافو واليديا القضية حامضة مابقاوش كايبززوه عليا …. ☺

او واحد النهار شديت التلفون قلتلو فلان انا تقت فيك و اعتبرتك اسمى انسان ولكن خرج منك العجب قلتلو لاش مابقيتيس تبغيني
قالي: مابقيتيش تعجبني
قلتلو وكون تحرقت
قالي : لايكلف الله نفسا الا وسعها
قلتلو :فين هي القوة والشجاعة دبالك
قالي الوقت ماعاطيانيش الشجاعة باش نكمل معاك
قلتلو :ادن؟
قالي :عمرنا مانقدو نكونو بجوج
قلتلو ادن ماتستلهلنيش
قالي : يمكن!
قلت: انا غاندعي كل صلاة باش عمرك تحضى ببنت بحالي
تما تسالات علاقتنا بصفة رسمية و دمرات داك الاحلام البريءة لي كانت كاتجمعنا فالاول . وتما عرفتو انسان ضعيف وجبان بلا ايمان .
كانتنى هادشي لي وقعلي عمرو يدوز على بنت الناس .

مقالات ذات صلة:

شعر حزين عن الحب أبيات رومانسية حزينة قوية

شعر حزين عن الحب أبيات رومانسية حزينة قوية

شعر حزين عن الحب شعر رومانسي قوي ومؤثر عن آلام الحب وأحزانه للعشاق المجروحين بسبب الحب، شعر يجعلك تبكي فكلماته من قلبي قلبك شعر حزين عن الحب غابتِ الشمسُ عن سماءِ قلبيوجفَّتْ الأزهارُ في بستانِ حبّيلا تسألي عن حال اليوميفإنَّ دموعي تروي حكايةَ عمري أيامي معكِ كانتْ...

جمل رومانسية بالانجليزي مع معناها بالعربي

جمل رومانسية بالانجليزي مع معناها بالعربي

إليكم باقة جميلة متنوعة من جمل رومانسية بالانجليزي مع ترجمتها للإنجليزي، جمل قصيرة وطويلة مكتوبة من القلب ومترجمة بكلمات من ذهب جمل رومانسية بالانجليزي جمل رومانسية بالانجليزي قصيرة You are the most beautiful serendipity of my life, the most wonderful truth I believe...

كلمات رومانسية راقية ومؤثرة للحبيب والحبيبة

كلمات رومانسية راقية ومؤثرة للحبيب والحبيبة

نشارك معكم باقة كلمات رومانسية رقيقة من كتابتي الخاصة، كلمات رومانسية للحبيب وللزوج، وكذلك كلمات رومانسية للحبيبة والزوجة. نتمنى أن تنال إعجابكم وتجدوا فيها ما يعبر حقا عن مشاعركم ويلائم قصة حبكم. كلمات رومانسية رقيقة ابتسامتك حبيبتي سماء صافية وقلبك بحر جارف وأنا بين...